強颱風打爛窗 黃翠如只顧攬住袋麵包

超強颱風「山竹」橫掃香港一整天，不少市民的家園也在短短時間內被吹到混亂不堪，黃翠如和男友蕭正楠的住所亦不能倖免，搞笑的是，翠如在強颱風吹襲期間，首先攬住的是一袋白麵包。

黃翠如昨日到銅鑼灣出席食肆活動，見到記者即關心外出採訪情況，然後提到其寓所亦受「山竹」影響，窗戶玻璃被打爛，更因為沒有儲備糧食，幾乎無啖好食。

她說︰「嗰日十號風球，初時有半棵樹飛埋窗，撞到嘭嘭聲，後來有一塊磚打爛咗玻璃窗，我哋仲用手頂住個窗，諗番都覺得好危險、好傻！之後搬走晒窗邊物品，個窗好近廚房，我驚會無嘢食，就衝去攞咗袋麵包坐喺角落度等，之後坐坐下就瞓着咗。」

與男友患難見真情

問到男友如何保護她？翠如甜絲絲笑說︰「佢好好，我醒番嗰時就見佢喺度執緊嘢同抹嘢、又掃地，好感動、好感激佢，」翠如笑言個人意識只擔心肚餓，幸好男友已經準備了打邊爐的食物，正好為她醫肚。

採訪︰Pauline

編輯︰黃卉彤

美術︰梁政敏