做飲食業工時長又辛苦，就連食飯都可能需要留喺餐廳內。有女網民發文到facebook專頁「屯門友」投訴，指日前中午到大快活用膳時，見到有員工食完飯仍霸住座位睇手機，無視佢推住BB車並帶住兩個小朋友在旁等位，令佢大感不滿。不過，佢呢番言論，亦引來其他網民一面倒批評。
樓主：食完飯仲要霸住位睇手機
該女網民表示，聽朋友講屯門市中心間大快活服務很好，「幫你拿餐又見推B車幫你搵位 」。不過，佢次次去親都係滿晒座，日前仲要發生不快事件，「搭正12點飯市員工食飯都霸咗3張4人枱......食完飯仲要霸住位睇手機，仲要推住BB車帶兩個小朋友企隔離等5分鐘都沒反應......呢個態度真係佩服......」
從樓主上傳圖片顯示，的確係有兩名身穿制服嘅員工正在用手機，惟枱上的碗碟中仍然有嘢食，未能判斷是否已用餐完畢；而且，兩名員工所坐的4人枱，旁邊仍剩有兩個空位。此外，樓主在文中指員工「霸咗3張4人枱」，圖中亦未見另外兩張4人枱。
網民：即係員工唔可以坐低食飯？
此事引來網民熱議，但均一面倒狠批樓主，「帶住小朋友大晒咩？」、「如果唔想等位，咪外賣囉，或者去另一間食，有無必要咁樣影人放上網！」、「職員唔係人，唔洗休息食飯咩！」、「即係員工唔可以坐低食飯？定係要企喺度丶或踎係地度食飯？」、「作為一位媽媽點解心態上刻薄成咁！人地食飯時間亦係休息時間，正常不過。」
專頁管理員：多體諒
對此，專頁管理員表示，做飲食辛苦人所共知，食飯時間把握機會休息係好合理；但另一方面，樓主話自己係同屋企人去用膳，有大有細，想快啲有位亦都好合理，「希望報料位師兄體諒下員工，主動友善咁問下人地方唔方便，admin相信香港人唔係咁冷漠嘅，幫到嘅都會盡幫。多體諒，一人行一步先係正路呀師兄！」管理員又建議，樓主可以問一問員工再搭枱，或者俾小朋友坐住先再去搵位，咁樣相信問題應該不大。
圖片來源：屯門友