個唱記招撞正開學日 華仔變身Batman湊女返學

天王劉德華將於今年底舉行20場跨年演唱會，昨日他開個唱記招，卻撞正開學日，華仔講笑指特地同日舉行活動「聲東擊西」，令傳媒都去採訪他，好讓女兒劉向蕙安心上學。

劉德華昨日以白馬王子Look登場，早前古天樂公開點唱《神鵰大俠》，華仔昨日特意「找數」獻唱。華仔在台上讓傳媒發問，問他不用湊囡囡上學？他笑說：「就知你哋會問，所以搞晒你哋嚟呢度，唔好搞我個女！今朝（昨日）我扮到Batman（蝙蝠俠）咁送佢返學，一啲都無人發現。」他大方表示屆時家人會去欣賞他的演唱會。

華仔重提今年初墮馬受傷事件，自爆在醫院獲一班護士長爭住為他洗身，又獲拐杖商戶邀請合作及贊助，他搞笑說：「我呸，我哋搵sponsor好嚴格㗎！」昨日他扭腰唱《獨自去偷歡》時動作靈活，他得戚說：「條腰係得嘅！」

墮馬意外留陰影

提到個唱今日在網上及電話熱綫售票，華仔希望解決部分售票問題，亦表明絕不加場。問到身體狀況，他坦言墮馬意外留下後遺症：「有時腳趾尾會痹痹地，又對咩事都有陰影，所以個唱一切以安全為主，舞台設計盡量少機關，又專登請人用耳機提我走位，避開危險位置。」

採訪︰Pauline

攝影︰林良明

編輯：李潔盈

美術：梁政敏