拍劇試過7日無瞓 吳卓羲帶住軀殼開工

不少演員將拍電視劇視為磨練演技的木人巷，同時也是「入屋」的好機會。無綫出身的吳卓羲坦言，開夜拍戲完全無問題，因為在電視台早已訓練有素，反而早前首次拍劇的劉心悠試過三日沒睡覺就已經大嗌捱不住。

吳卓羲（Ron）與劉心悠前晚出席電影《再見．女人街》煞科宴，適逢下月2日是Ron的39歲生日，心悠推出蛋糕為壽星仔送上驚喜，而Ron表示生日正日會與家人食飯慶祝。

心悠之前在酷熱天氣下到女人街拍外景，引致皮膚敏感，她說︰「已經康復中，之前化粧又流汗，皮膚好易敏感，加上呢部戲好多夜班，對皮膚同健康都唔好。我平時習慣早睡早起，拍戲收工嘅時間就係我平時起床嘅時間。睇咗皮膚科醫生，食咗類固醇，塊面有少少腫。」

心悠唔敢要求休息

有多年拍劇經驗的Ron就笑言︰「開夜班絕對無問題，收工只係返屋企沖個涼又開工，最長時間試過七日無瞓。」心悠聽到Ron七日不眠，嚇到呆了，她直言拍《宮心計2深宮計》時試過三日不眠，已經頂不住，旁邊的Ron無奈地說︰「捱唔到就無得撈，但當時真係得個軀殼，係無靈魂咁同對手做戲，個腦完全記唔到對白。記得當時拍最後一場戲，拍到凌晨四、五點，我同松哥（劉松仁）做對手戲，拍到第三take，我講第一個字已經NG，導演見到咁，即刻叫我收工，我揸車返屋企嘅時候，車速50公里都剷上壆。」

心悠則慶幸公司會為她爭取睡眠時間，又謂當然整個劇組都無得瞓，因此她都不會要求休息，只要大家齊心合力拍好劇集就可以了。

此外，Ron舊愛張馨予昨日在上海外灘半島酒店舉行婚禮，嫁給內地特工何捷，有指酒席最低消費14,888人民幣，最高25,888人民幣。

撰文︰Pauline

編輯：黃寶恩

美術：梁政敏