賀入行60年 薛家燕十字步跳入紅館

薛家燕慶祝加入娛樂圈60周年，將於12月4至5日於紅館舉行《薛家燕愛你無限60年演唱會》。原來今次是家燕姐首度殺入紅館，除了化身「Captain Nancy」拍MV外，昨日舉行記招時，好姊妹「七公主」陳寶珠、馮素波與王愛明更現身撑場，令她感動不已。

家燕姐昨日風騷現身記招，不但率領十多位粉絲大跳「十字步」，寶珠姐等三位「公主」又即場送上鑽石咪高峰，寓意她閃亮紅館。一眾圈中好友，包括成龍、蕭芳芳、許冠傑、譚詠麟及謝賢等，紛紛拍片預祝個唱成功。

家燕姐坦言入行60年才在紅館開騷，確實遲了一點，又透露早在當年復出拍《真情》時，「演唱會之父」張耀榮已找她開紅館騷，但當時自己想在其他方面多賺錢而婉拒。「之前試過入紙申請，但都係唔批。咁啱今年係我入行60周年，諗住係最後一次申請，唔得就算，但世事就係咁神奇，批到2018年最後一個月檔期。今次有好多朋友幫忙，部分仲專程由外國返嚟撑我，真係好感動。」

邀謝賢上台合唱

問家燕姐可會邀請有份拍片的藝人做嘉賓？她笑言要大賣關子，至於「七公主」，除了蕭芳芳及馮寶寶仍未定案，其餘幾位公主都會上台力撑她。提到「四哥」謝賢揚言到時上台搶鏡，她笑說：「好多年前同佢一齊登台，佢嚟嘅話一定走唔甩啦！」

採訪︰Pauline

編輯：李潔盈

美術：梁政敏