《金盆𠺘口》圓滿落幕 黃子華拋咪哭別舞台

黃子華一連26場棟篤笑《金盆𠺘口》前晚演出尾場，謝幕時子華終忍不住流下男兒淚，全場觀眾更齊聲大叫「多謝你」。及後，子華將咪高峰拋到台上的椅子，瀟灑地返入後台，為他最後一場棟篤笑畫上完美句號。

黃子華事先公告尾場是他「封咪前」最後一場棟篤笑騷，所以尾場嘉賓粒粒皆星，包括鄭裕玲（DoDo）、黃秋生、吳君如、容祖兒、古巨基及周慧敏等。子華一出場即帶領全場狂嗌「嘻嘻嘻」，又指看過的觀眾要繼續笑︰「未睇過嘅人，一嚟睇收尾嗰場，係你最後嗌嘅機會！」全場即大叫「回水」，場面震撼。

子華在台上的一舉一動，觀眾均反應超級熱烈，連他在台上飲水，全場亦尖叫拍手。他忍不住笑說︰「依家喺屋企飲水，全屋人都會放低筷子，阿媽都會拍手，平時仲偷偷地睇我飲水。」到尾段時，有粉絲送上一隻粉紅色傻豹公仔，子華笑說︰「多謝你，雖然個樣有啲不祥，掛喺門口應該無賊入嚟。」說罷他的恤衫忽然爆鈕，他不禁自嘲︰「呢次真係回水喇，我第一次着㗎咋。」

解開衫鈕滿足觀眾

及後，台下觀眾大叫「除衫、除褲」，子華亦大方解開煲呔及衫鈕，又除西裝外套騷品牌︰「呢件嘢真係面斥不雅！」前晚場外販賣的紀念品「回水杯」全數售罄，子華謝幕時將兩隻飲過的私家水杯拋給觀眾說︰「一隻杯，萬幾人分咩！」最後，他唱出歌曲《幻海奇情》，至晚上11時正式落幕。

採訪︰Pauline

編輯︰李潔盈

美術︰梁政敏