峇里開騷曬出禍 蘇永康「燒焦」肚皮

早前蘇永康（阿公）與許志安在印尼峇里開騷，阿公趁着小休跑到沙灘曬日光浴，誰料竟曬出事，肚皮及臉部慘被「燒焦」狂甩皮，幸好緊急敷Mask才得以救番塊面！

蘇永康昨日帶同囝囝Jazz現身書展出席簽名會，平日見慣各位世叔伯的Jazz，見到同場的安德尊突然現身想合照時，竟然嚇到爆喊。阿公即將囝囝交給太太抱住，Jazz立即收聲，令安德尊尷尬地行開。

剛從峇里開騷回港的阿公，臉部明顯「紅卜卜」，他訪問時揭開上衣大曬甩皮的肚子，笑說：「我同安仔做完騷，第二日我見個天陰陰哋，以為無咁曬，於是走去曬太陽，點知曬咗唔夠五分鐘就變成咁！」幸好他上機時立即狂敷面膜「急救」，面部才不至於像肚皮般甩皮。他說︰「我再用原始方法，用毛巾喺面上刮走死皮，否則邊行邊好似落雨咁！」

陳松伶愛老公夠自律

另外，陳松伶（松松）昨天亦現身書展，支持好友出書，她表示跟老公張鐸同樣是愛書之人︰「平日喜歡喺床頭放一本書，我鍾意書嘅手感。」她自覺人愈年長，愈覺得學習不夠，問她會否考慮重返校園？她表示北京有很多短期課程，她最想修讀管理︰「可以管理下自己及管理人緣，其實老公係我嘅學習對象，佢超乎我想像咁老成同自律，佢每日拍戲12個鐘，收工仲可以去跑步，我叫佢唔好咁搏，再瘦就顯得我好肥！」

採訪︰Pauline

攝影︰林良明

編輯︰李潔盈

美術︰熊偉然