黃翠如做媒人 唐詩詠擇偶唔要似蕭正楠

感情生活Dry了一段時間的唐詩詠，連好姊妹黃翠如也為她着急，表示要做媒人介紹男仔。不過詩詠揚言唔心急拍拖，更笑指對方千萬不要以蕭正楠做人辦，相當搞笑！

唐詩詠及湯怡昨日到尖沙咀出席時裝活動，剛拍完劇集《白色強人》的詩詠，日前去廣州拍攝飲食節目，但竟突然失聲，在鏡頭前幾乎收不到音。詩詠笑言︰「試過食開聲藥，又飲燉檸檬，咩方法都試過都係唔得，但一返到香港就無事。」

提到詩詠跟洪永城甩拖至今仍然單身，詩詠只說︰「等下啦，我都無人追，仲等緊朋友介紹。本來想試用App去識朋友，但本身都係慢熱嘅人，所以都係決定由朋友介紹。」她表示好友翠如BB答應做媒人，可惜一年來都沒有真正介紹過︰「千祈唔好搵蕭正楠做藍本，我驚認錯人呀！」問到另一好姊妹田蕊妮可有好介紹？她大讚阿田老公杜汶澤識煮飯，又正又有內涵。

湯怡落閘避談洪卓立

同場的湯怡月花過萬元買衫，雖然她有自己的衣帽間，但買得太多，也令同住的媽媽投訴。男友洪卓立可有意見？她卻避談說：「唔講咁多，低調啲好，講到悶。（講結婚？）呢兩個字從未喺腦海中出現過，依家要專注事業。」

採訪︰Pauline

編輯︰李潔盈

美術︰梁政敏