離港半月拍旅遊節目 陳敏之掛住囝囝變喊包

陳敏之16年誕下兒子雷子樂後，從未試過離開囝囝超過一星期。不過早前她與區永權往台北拍攝旅遊節目，要逗留半個月，她竟然太掛住囝囝而變喊包，更笑言以後出外景，會考慮帶兒子同行。

陳敏之和區永權昨天出席無綫新節目《到此一遊台北》宣傳活動，他們在台北逗留17天拍攝，敏之坦言十分辛苦：「我唔係話拍攝過程辛苦，而係我好掛住個仔！」她更透露被當地一位藝術家的畫作觸動淚腺，令她在鏡頭前哭崩：「有個藝術家幫我哋畫畫，但我哋睇唔到佢畫咩，過程間不停傾偈。藝術家知我有個仔，最後幅畫就係我抱住個仔，好似醫院生完個仔嘅Moment，搞到我喊到個粧都溶晒。之後返到酒店，我又喊咗三次，嗰一刻想快啲返香港，我真係掛到斷腸，我好驚訝個畫師點會知道我當時嘅心情！」

着平底鞋遷就拍檔

提到台北之旅由朝食到晚，問敏之可有增磅？她笑言到當地一星期，已覺自己身形「吹脹」了，又有包包面：「我以為唔覺，點知條褲拉鏈位好緊，所以知道要控制食量，食嘢重任就交畀區永權。好彩我返港後即刻做運動，幾磅肥肉好快減咗。」

同場的區永權笑言增磅後仍未成功減磅，不過十分感謝敏之全程沒穿高踭鞋，以遷就自己高度：「希望收視好可以添食，到時敏之可以任着高踭鞋，同帶埋個仔去，我又可以帶埋小朋友一齊去玩。」

採訪︰Pauline

編輯︰李潔盈

美術︰梁政敏