10月香港擺酒 苟姑娘預告做性感新娘

苟芸慧、江若琳（Elanne）、湛琪清及歐陽巧瑩幾位準人妻，以及剛完婚的林芊妤昨日出席香水活動，苟姑娘透露已定於今年10月在香港舉行婚禮，更預告會以索爆造型出嫁。

苟姑娘曾表示由未婚夫陸漢洋主力籌備婚禮，只負責揀婚紗及安排姊妹團的她自言已選得心頭好︰「（婚紗）有少少性感，後面有個拖尾設計，方便日間有長輩嘅時候遮住性感部位，夜晚Party先拆落嚟。」提到姊妹團成員，她表示打算找李亞男、王君馨、岑麗香及鍾嘉欣等「處女黨」成員︰「嘉欣陀緊BB，唔想佢太辛苦，要到時先知。本身都有個好長嘅List，當然希望到時大家個檔期都安全，一切交畀上天安排。」

江若琳想帶未來仔女睇世杯

江若琳昨晚凌晨欣賞世界杯球賽，力捧英格蘭的她只小睡三小時便出席活動。她希望四年後可親身到現場睇世界杯︰「可能到時生咗小朋友，或者都三歲！（努力造人？）我想結婚當日身形靚靚，唔想大住個肚。四年後小朋友仲細，可以二人世界去睇波，再過多四年先帶小朋友去！」

同場的汪詩詩表妹湛琪清戴四卡鑽戒現身，自爆兩個月前在峇里島旅行時，獲男友驚喜求婚。她笑指當男友送上戒指時，她起初竟大嗌「No」︰「因為我無化粧又無Set頭，個樣好Ugly，唔想咁嘅樣接受求婚，但最後都有講『I do』。」

採訪︰Pauline

編輯︰李潔盈

美術︰梁政敏