拍劇撞親後腦 高海寧：視力有後遺症

高海寧（高Ling）日前拍攝新劇《C9特工》時，不慎在街市跣倒引致後腦受傷，即時送院治理後，幸無大礙已出院。她昨日宣傳下周首播新劇《BB來了》，透露目前仍未完全康復，擔心視力受損。

高海寧、黎諾懿及李佳芯（Ali）等一班《BB來了》演員，昨日齊在育兒中心進行宣傳活動。高Ling憶述意外當日，跌落地時幸好有臀部卸力，但右邊腰間瘀了一大片，後腦亦腫了，她說︰「都有少少後遺症，右眼睇嘢好似有飛蚊症咁，其實好快已照咗視網膜，應該無大礙，不過一條眼肌運作唔太好，稍後要做磁力共振。」

高Ling表示目前不可以駕車，問她可有觀音兵做柴可夫？她笑言︰「我從來唔收兵，公司都有車接載出入外景場地。（男友鄧智偉有無載你？）佢都唔揸車，佢自己有司機，但司機都好忙。」她又稱劇中仍有不少動作戲，但無意搵替身或者押後拍攝。

李佳芯最怕抱初生B

Ali湊B顯得雞手鴨腳，試過一手抓着「BB」頭部，好彩眾人只是用娃娃公仔代替真BB來示範。她直言最怕抱初生嬰兒，「試過要抱出世15日嘅BB，我真係唔敢掂，好怕整親佢哋。」諾懿囝囝小春雞目前已一歲，他恨追個女湊成「好」字，並笑指：「聽講生女就要夜晚努力，生仔就日頭。嗰時生小春雞都係日頭努力，不過呢排拍劇拍到通宵，無時間造人。」

採訪︰Pauline

攝影︰林良明

編輯︰陳禮恒

美術︰梁政敏