明年出道廿周年 祖兒誓開夠16場紅館騷

容祖兒、李克勤、劉愷威及關菊英等前晚在紅館演出回歸騷，祖兒明年入行20年，她透露已入紙申請明年紅館檔期，計劃屆時開16場演唱會，打破自己開騷場次紀錄。

祖兒前晚穿上閃片西裝外套，內襯低胸衫，造型相當性感。祖兒透露剛從日本旅行回港，此行特地去欣賞歌手玉置浩二的演唱會，更碰巧遇上同樣去睇騷的蘇永康及張敬軒。她說︰「每個我哋呢一代嘅人，都會視玉置浩二係神級歌手，我未睇過佢嘅香港騷，就問公司攞幾日假飛去睇。」

提到祖兒明年出道20周年開騷，會否開夠20場？她笑說︰「唔會啦，上次開15場，一開騷就病，體力一定要練下。今次一定要健康完成個騷，一定要聲靚，20場諗都唔敢諗，16場啦！」她表示紅館已批出檔期，可惜跟她的理想日子有出入，所以重新申請。此外，有傳她最近豪花2億元買樓，她笑說︰「唔回應，下次見到我媽咪就問佢，唔關我事！」

劉愷威拒出山做歌手

同場的劉愷威與關菊英合唱《講不出聲》，他笑說：「之前喺古巨基演唱會同五虎合唱，今次大會邀請，我知道係紅館梗係飯應啦！」會否考慮再做歌手？他即耍手說：「其實做歌手同做演員係兩回事，做歌手壓力大好多。（出騷唱歌？）要睇下唱咩歌，驚自己駕馭唔嚟。（唱自己歌？）都無人識，當新歌咩？」

撰文︰Pauline

編輯︰李潔盈

美術︰梁政敏