讚男友廚藝 單文柔陳展鵬煮飯仔添情趣

陳展鵬前晚為《美女廚房》擔任嘉賓，與「美女學徒」女友單文柔同場，二人受訪時談及為對方下廚的趣事。不過陳展鵬對女友的廚藝評價相當中肯，坦言「有啲好食、有啲唔好食」，但單文柔聞言仍然冧爆甜笑。

提到單文柔的廚藝，陳展鵬笑笑口說：「可圈可點，因為佢要為節目煮啲奇特菜式。我好少會話唔好食，通常會講『可以啦』。」問單文柔廚藝被彈可會生氣？她說：「真嘢就唔好講出嚟。」陳展鵬聞言笑住反問：「即係嬲呀？」二人甜蜜大耍花槍。

陳展鵬自言平日也有入廚：「我煮得快狠準，佢（女友）煮得慢啲就當宵夜，依家可以上網學煮餸，好方便。」單文柔讚男友手勢不俗，但講笑指自己煮得較好吃。私下有否一齊煮飯仔？陳展鵬說：「好似有，又好似無，一齊諗下煮乜都開心，係情趣嚟，醉翁之意不在酒，最緊要係過程啫。」

余潔滢開腔護余香凝

同場的另一「美女學徒」余潔滢，提到胞姊余香凝跟陳家樂分手後，被罵為拜金港女，余潔滢表示戥家姐心痛：「好多講法都唔係事實，佢哋已講出真相，其他人點諗控制唔到。感情係兩個人嘅事，佢哋做咗決定，將工作放首位，旁人好難講可唔可惜。」

撰文：Pauline

編輯：李潔盈

美術：梁政敏