高質茶記 3國炒蛋味超濃

中環人報料「四季」大排長龍，說的不是四季酒店，而是新開的茶記「四季常餐」--主攻四季供應的常餐，茄牛通、忌廉雞湯落足料，炒蛋更用上3個產地雞蛋來炮製，難怪日賣超過200份！

兩位嘴刁店主在飲食業工作多年，對出品高要求。一位叫Rico，曾從事某大飲食集團餐飲研發工作，早年赴倫敦藍帶廚藝學院進修，後來在當地米芝蓮二星餐廳Greenhouse任廚師；另一位店主曾於中環開中高檔日本料理。兩位拍檔開茶記，主攻一年四季都會食的常餐，加上幾款午飯及厚蛋治，整份餐牌只得十多款選擇，貴精不貴多，寧願專注做好每個細節。

3種番茄熬鮮甜茄湯

常餐有兩款--茄牛通和真忌廉雞湯通配火腿，落足靚料且無味精。番茄湯用上3種番茄，包括罐裝意大利San Marzano番茄，取其茄味濃又甜，還有酸甜的歐洲plum番茄及肉多的本地番茄。每日用足80斤番茄加入大量牛骨去煲湯，番茄先焗個多小時，以10kg番茄計，焗至濃縮到3kg，煲出來的番茄湯味超級濃郁鮮甜。雞湯靈感源自日本拉麵店的雞白湯，以雞殼、雞腳、豬骨及日本米一齊熬足6個鐘，鮮甜且帶天然creamy感，配有坑紋通粉更吸湯，好味到忍不住狂飲湯。

店主們試勻市場30、40種雞蛋，最後精挑了日本太陽卵、湖北蛋及美國蛋，結合三國產地的雞蛋來炒蛋，蛋香很濃厚又很綿滑。麵包即叫即烘，塗上牛油後，放在日式明火高溫串燒爐上烤烘至外脆內軟，索滿牛油香之餘，亦帶BBQ風味，入口時還暖笠笠。茶記有如此質素，簡直超班！

四季常餐

地址︰中環威靈頓街112-114號地下C舖

電話︰3594 6612

營業時間︰星期一至六，8am-5pm（星期日休息）

平均消費︰$50

編輯︰魏雋

美術︰Simon