否認韓籍太太懷孕 周國賢︰幻覺嚟嘅啫！

周國賢（Endy）、AGA（江海迦）及李克勤前晚為拉闊音樂會綵排，周國賢日前在IG Po相，與韓籍太太李美英大曬恩愛，雖然相中周太肚凸凸，但周國賢強調老婆無陀B，更笑言大家見到的只屬幻覺！

已是三女之父的周國賢，前晚耍手擰頭，否認自己將第四度做爸爸︰「唔好啦！（想追仔？）唔係呀嘛？應該就唔係。」問他會否向育有兩名兒子的克勤取經生仔？克勤即搶答說︰「生仔唔同，要合指一算，我梗係唔計日子啦，係情到濃時就得㗎喇。」問克勤會否調轉向周國賢請教生女秘方？克勤搞笑說：「你唔係咒我啩！我啱啱先甩到身，去火車旅行咋！」

克勤呻做老竇艱難

夾在兩男中間的AGA，聽到眾人大談生仔經，表情略帶尷尬，克勤見到笑說：「你哋唔好喺女仔面前問呢啲嘢啦。」AGA表示兩位爸爸相當幸福，誰知克勤與周國賢一人一句，大呻為人父相當不易。克勤先說：「你睇我好，我睇你好，家家有本難唸的經，我辛苦你唔知啫。」周國賢則拍拍AGA膊頭，語重深長說：「你都係玩耐啲，遲啲先諗！」

三人前晚綵排時合唱《夏日之神話》，克勤即席彈結他，而周國賢自言開騷時會演奏大提琴。AGA透露將在音樂會上為新歌跳舞，但克勤一聽到跳舞即「落閘」，笑言只限「左麟右李」開騷才會跳舞。

撰文、編輯︰李潔盈

美術︰Simon