文詠珊 體諒黎明嬲嬲豬

文詠珊（JM）、李佳芯（Ali）昨日出席SWAROVSKI水晶品牌活動，中性打扮的JM「中門大開」相當吸睛，她直認是真空上陣，因為方便配襯首飾。

JM近日忙於為網劇《冒險王衛斯理》宣傳，同劇的余文樂快將做爸爸，而舊老闆黎明亦喜添女兒，JM表示身邊好多喜事，「send咗message畀Leon，不過我都係睇報道才知道，好想送份禮物給BB，但其實黎明乜都有，真係好難諗禮物，或者考慮送一條水晶裙畀BB。」

有指黎明B女早產一個月，他不滿被身邊人爆料，JM聞言後尷尬一笑︰「我乜都唔知，其實做呢行都想有自己嘅空間同私隱，佢都係想保護家人啫。」Leon剛榮升爸爸卻換來一肚氣，JM相信他真的很不開心，呼籲大家給予空間。

Ali謝絕男友探班

李佳芯忙於拍攝新劇《白色強人》，她透露要拍到七月，稍後將到深圳拍攝醫院實景三星期。Ali表示有同事會買熱水壺甚至帶水出外景，但深圳近香港，應不用擔心。問男友陳炳銓會否去探班？她即笑說︰「拍攝嘅地方謝絕男賓，其實我去到邊都等於女生宿舍，有咩事返香港再講啦！」

採訪︰Pauline

編輯︰陳禮恒

美術︰梁政敏