胡鴻鈞28歲生日等人約

胡鴻鈞（Hubert）與胡琳前晚出席髮型用品活動，他將於下周二（27日）踏入28歲，笑言等待好友許廷鏗及吳業坤相約慶祝：「我等男性朋友約，自己生日唔會主動約啦！」

胡鴻鈞笑言歌迷相當有心，大約200名粉絲為他舉行生日派對。他說：「每年都會搞，佢哋仲租咗Ball room，係我演完石敢當後，最多人參加嘅一次。」

問他早前跟許廷鏗旅行，有沒有順道慶生？他說：「咁又無，成班Friends一齊，旅行同生日飯一次過就蝕咗。（期待你啲男性朋友送咩禮物？）我份人好易話為，只要有心就得。」他已呼籲歌迷不要送禮物，反而將買禮物的錢用來做善事，更有意義。

另外，胡鴻鈞早前突襲將軍澳一商場的小食街，不但勁掃美食，更不時被街坊要求合照，令他倍感親切。

胡琳凍傷面嚇到崩潰

胡琳前晚重提冰島拍MV時凍傷，她自言患上皮膚炎，俏臉不停滲水，形容臉部如「進擊的巨人」。「現場都化唔到粧，大家又唔敢話我知咩事，差啲喊出嚟，之後有人話咗我知，嗰一刻個人崩潰咗。」她笑言趁休養期間苦中作樂，在社交網舉辦冰島P圖大賽，娛人娛己一番。

撰文：Pauline

編輯：李潔盈

美術：梁政敏