任達華忘記買花 劉嘉玲叫華哥送樓畀老婆

劉嘉玲、任達華、衛詩雅和胡渭康到維園年宵市場為賀歲片《我的情敵女婿》宣傳，已擁有幸福家庭的嘉玲和華哥，積極地幫詩雅覓姻緣，嘉玲更邀請詩雅到其家中圍住桃花行個運，令詩雅雀躍不已。

昨日情人節，嘉玲自爆老公梁朝偉剛返港，晚上待她出席完電影首映禮後，再返屋企與偉仔開香檳慶祝，嘉玲又甜思思表示已準備禮物。至於出名浪漫的華哥，才猛然醒起早上忘記送花給太太琦琦︰「反而佢送花畀我，好大劑！真係無面。」在旁的嘉玲即建議他買間屋送給老婆，華哥笑說要到2019年。「咁都要畀時間我拍戲賺錢㗎！」他又說自己買幾間屋都不及嘉玲一間又大又靚，嘉玲即笑罵他︰「你講咩呀？唔好咁大聲，唔係啲人又話我有幾億身家。」

撮合衛詩雅方力申

另外，仍是單身的衛詩雅表示，情人節全日為電影宣傳，晚上首映邀請了多位單身男女朋友欣賞。華哥得知詩雅喜歡游水，慫恿她考慮同前港隊泳手方力申拍拖，令詩雅大感尷尬︰「搞到好似全香港為我招親咁！」詩雅聽說年卅晚行年宵，在花檔中「偷」桃花會行桃花運，華哥聞言後即告誡她︰「犯法嘅嘢唔可以做。」詩雅笑言其實只是「偷」一粒花放入口袋而已，於是嘉玲邀請詩雅到她家中圍住桃花行幾個圈。「我屋企棵桃花好靈，一定帶嚟好運。」

採訪︰Pauline