Shine自爆甩褲瘀事

將於下月在紅館開騷的組合Shine早前接受無綫娛樂新聞台節目《StarTalk》專訪，大談入行後的難忘事。天佑爆料二人曾試過先後在活動中甩褲，令他們勁尷尬。

Shine在節目中與主持許文軒大談將再在紅館開騷感受，天佑說︰「初出道有一次簽唱會，又南唱唱下甩褲，我心諗大鑊，我即刻跳過去遮住。我自己亦試過喺一個水上節目，喺上水一刻畀水壓扯甩半條褲。」

至於回想當年在日本受訓，天佑說︰「我哋每日得好少錢，所以每餐我哋都會去食牛肉麵，因為嗰間啲麵特別平，我哋仲要唔叫嘢飲，慳得就慳，依家我哋好識精打細算。」曾拍攝《葉問》等電影的又南亦分享往事︰「有段時間我去內地拍戲，公司唔畀我帶助手，嗰段時間都係靠自己，成長特別快，我仲堅持用普通話講對白。」

撰文︰Steven

編輯︰林梓添

設計︰李明