黎明澳門騷狂曬金句

天王黎明（Leon）前晚在澳門舉行《黎明Leon Random Run 2017》演唱會，出名是金句王的Leon全晚心情大靚，連環送上金句之餘，又自爆跟曱甴十分「有緣」︰「我細個夢見曱甴入咗耳仔，用手去摸點知係真嘅，最終都殘酷地消滅咗佢哋。」

Leon前晚如「開籠雀」般不停講感受，令個唱變得如棟篤笑一般。個唱中又設觀眾問答環節，有歌迷表示會永遠支持他，又有人說︰「如果（支持）有時限，我會揀一萬年。」Leon回應說︰「放心，我會永遠活喺你哋嘅永遠入面！」剛在上周一度過51歲生日的他，獲歌迷獻唱生日歌賀壽，他亦笑說︰「祝2017、2018年生日嘅人，生日快樂！上個禮拜劇組問我幾時生日，我答3月15日，唔想開工搞咁多嘢，不過我身份證上真係寫3月15日生日。」

做人懵懵地最幸福

Leon前晚在台上用紙巾抹汗時，仍不忘發表偉論︰「通常人嘅構造都係腳板底排汗，但我就喺個頭度，成個頭濕晒。」台下有觀眾讚Leon靚仔，他亦搞笑說︰「好多人都靚仔過Leon，我嘅座右銘係唔好做最蠢嗰個，做人懵懵地最幸福。」

撰文︰李潔盈

編輯︰黃寶恩

美術︰李明