封殺令下 歐陽震華「懷念」張繼聰

無綫台慶劇《誇世代》中，角色相當出位的張繼聰，疑因受經理人公司與無綫官司影響而慘被封殺，昨日阿聰繼續缺席宣傳，歐陽震華（Bobby）揚言感到可惜。

歐陽震華昨日出席活動時，似乎仍未知阿聰被封殺，當聽到這個消息後立即大呼︰「陰公！如果佢嚟埋，加埋我、陳豪同坤哥（吳業坤），全部男丁出晒嚟咪好囉。（會再出力宣傳？）盡人事啦，（打畀阿聰安慰佢？）唔使……不過無計，有官司進行緊又唔方便講咁多。」Bobby又大讚阿聰拍攝時經常有添加創意，加上50集拍足半年，早已建立深厚感情。他笑謂︰「惟有玩遊戲時叫佢個名幾次。」

坤哥唔敢望女仔

眾人昨日到觀塘一間女校進行宣傳，坤哥竟口快快笑言︰「好耐未嚟過女校……我係話做校園騷，以前喺慈雲山返學，都成日經過附近女校。（等心儀女生放學？）無！我嗰時成日挺起胸膛，但無畀人睇得上眼，（依家咪可以威番啦！）呢啲未成年㗎！」

Bobby跟學生玩跳繩時，司儀提醒學生要遷就「大叔」，事後問Bobby可會介意？他笑謂︰「大叔係代表事業有成，返國內做嘢先知呢個稱號並無貶義，就算比自己後生嗰啲都畀人叫大叔，其實係代表地位，唔係年齡之分。」此外，對於方逸華離世，Bobby坦言可惜，「我呢啲小職員，只能喺台慶遠觀，六叔叫得出我個名幾開心。」

採訪︰Pauline

編輯：林梓添

美術：顏玉玲