《我愛EYT》阿Bob震肥腩跳唱《狂野之城》 觀眾︰嚇到個心離一離

阿Bob（林盛斌）前晚現身無綫《我愛EYT》，化身「肥版」郭富城惡搞90年代金曲《狂野之城》，最正是他抄足城城十年前的個唱舞衣。當年郭天王騷肌型到爆，今次阿Bob卻震肥腩玩破格。不少人寸爆他將T-Back貼心口太低俗；有網民則力撑他夠放要畀Like！

前晚，王祖藍領軍台慶劇《老表，畢業喇！》眾演員包括阿Bob、細細粒（陳嘉佳）、郭晉安及泰臣等亮相《我愛EYT》，全晚焦點落在阿Bob身上。

一身肥肉的他，罕有地在電視觀眾前露兩點，化身肉騰騰的「Bob富城」演繹《狂野之城》，其鬆弛腩肉令畫面的笑點大增，即時令現場人士起哄。不過，全無跳舞底子的阿Bob落力跳唱勁有heart，令演出短片於網上瘋狂洗版。

獲無綫配合玩大啲

其後，阿Bob在幸運星環節僅取走四萬獎金，卻失去價值十萬元的名貴房車。事後，不少網友翻loop其演出，取笑他騷肥腩玩惡搞超重口味；有人則大讚他跳得好睇又好笑。

昨午本報聯絡阿Bob，他謙稱其扮嘢技巧不及祖藍等高手︰「我扮嘢sense唔強，但今次公司畀到舞蹈員，所以玩大啲。之前排咗兩次，演出時好緊張，好彩dancer們都話我Live時跳得最好！」他又指汪明荃及鄭丹瑞都有讚好，又聲言要感激網友意見。阿Bob說︰「網上有讚有彈，有人叫我畀心機，有人話好肉酸，多年來我都無所謂，最緊要有效果。」提到失落房車大獎，阿Bob則處之泰然，強調只是意頭嘢，有luck已足夠。

撰文︰Steven、Pat

協力︰Jenni

編輯︰黃寶恩

美術︰Simon