古仔拍戲傷眼球縫8針 幸未影響視力

古天樂（古仔）早前拍電影《真．三國無雙》時不慎弄傷右眼眼球，要到醫院縫了八針，受傷初期甚至要戴上太陽眼鏡保護眼睛。昨日古仔出席信用卡活動，已不用再戴墨鏡，不過現階段仍未可以曬太陽。

古天樂昨日獲邀出席銀行信用卡活動，提到早前在內地象山拍戲時意外令眼球流血，需坐專機返港診治，幸好未有影響視力，不過卻縫了八針。古仔曾表示受傷後連坐飛機都擔心氣壓影響，甚至眨眼都會痛。

昨日活動上，古仔表示傷口剛拆綫，眼球仍有少許紅，但已不用再戴墨鏡。「其實情況已好番好多喇，基本上出街唔使戴太陽眼鏡，但係仲未可以曬太陽，事關紫外綫會刺傷眼球，紫外光甚至會影響到色素變異。啱啱先喺新西蘭拍戲，嗰邊紫外光特別強，會小心啲。」

盼與父母同遊北歐

古仔獲大會送了兩張芬蘭機票，他自言未去過當地，打算稍後有空與父母到聖誕老人村過聖誕。「去見聖誕老人係小時夢想嚟㗎，（順道睇北極光？）都想，不過要天氣配合，聽講今年極光出現次數較密，同埋嗰邊風景如畫，同兩個老人家去都唔錯。」

採訪︰Pauline

攝影︰林良明

編輯：林梓添

設計：梁政敏