入行30年零緋聞 歐陽震華自嘲無面

無綫50集台慶劇《誇世代》前晚首播，一班演員歐陽震華（Bobby）、田蕊妮、邵美琪、森美及龔嘉欣等，拉隊到Bobby的中菜館開兩圍，邊食飯、邊睇電視。

Bobby前晚率先到菜館準備，笑言親友都訂位食飯，但是來看明星。他說劇集拍了半年，難得大家合作得很開心。「我負責搞風搞雨，我入行30幾年都無乜緋聞，唉！死條心啦，我真係無晒面，好渣！」

想《壹號皇庭》再埋班

談到最近重播《壹號皇庭》，Bobby稱當年已是緋聞絕緣體，他笑謂︰「我事業為重嘛，邊得閒做無謂嘢？係都揀陶大宇啦，就算大宇唔要，唔通我執手尾咩？（你輸在少頭髮喎！）頭髮唔代表乜，阿姐都咁Like家英哥，同蘇永康比我都輸啦……連當年黎耀祥個樣都好過我。」Bobby坦言自己很想與《壹》原班人馬再合作，但奈何大多演員已經離巢。「個個走晒，得我磨爛蓆啫！」

田蕊妮和吳業坤（坤哥）多次合作，問坤哥與阿田下一套劇會否想演情侶？阿田笑言初入行時曾遭前輩撩，豈料入行廿多年後，每日開工卻遭坤哥調戲，她更高呼︰「娛樂圈變咗好多，姐姐受不了，所以我要放長假。」當坤哥想反擊是向Bobby學習，卻遭對方踩多腳︰「你做了幾年，個個月有緋聞，但聽聞全部都係食死貓，哈哈！」

坤哥直言夠膽跟阿田演情侶，又說要研究阿田的嘴形，令阿田哭笑不得。問坤哥可擔心被阿田老公杜汶澤打？他說︰「我係專業演員，又唔會非禮佢。」阿田笑言若與坤哥拍咀戲，便會切腹自盡，在片場發生命案。

採訪︰Pauline

攝影︰林良明

編輯：林梓添

設計：梁政敏