完成史泰龍新戲 張晉返港「團聚」

張晉近年工作排得密麻麻，最近還被荷里活電影公司睇中找他拍片，與妻女聚少離多的他，笑言有屋企得天下，與家人團聚才是最幸福。

銅鑼灣新戲院Cinema City JP前晚開幕，由黃百鳴率領張晉及謝天華等主持亮燈儀式。剛在美國拍史泰龍新片《逃亡大計3》的張晉表示，已完成自己的戲份，終於可以返港與家人團聚，他笑言︰「兩個女仲認得我，不過無見個幾月，佢哋大得好快，（視像傾偈？）見到面仲可以攬下摸下，感覺好唔同！」雖然與家人分隔兩地，不過張晉很開心可以拍到喜歡的作品，更笑謂︰「得屋企得天下，有啲嘢要平衡番。」他更說有追看太太蔡少芬（Ada）的新劇《老表，畢業喇！》，Ada在劇中叫張進強，令他忍俊不禁，更打趣表示要向王祖藍收版權費，他又大讚Ada做戲用心，是個好演員。

嘉穎鍾意拍拖睇戲

自言喜歡入戲院睇戲的鄭嘉穎，自爆與女友陳凱琳（Grace）拍住拖睇戲，即使被「野生捕獲」都會大方答應合照。問到是否與Grace都喜歡欣賞同類片種？他說雖然會各自研究男女演員的戲，但當遇上好戲會一齊欣賞，不會刻意遷就任何一方。嘉穎又稱自己睇戲很隨意，電視正播甚麼都會睇，反而女友較喜歡上網慢慢揀。

採訪︰Pauline

攝影︰林良明

編輯：林梓添

設計：梁政敏