傳YoYo搜「狐」 王浩信︰太太唔得閒理

王浩信最近接連與女星扯上關係，前日斬釘截鐵澄清與陳偉琪的緋聞，昨日又再被雜誌指他多年來不斷與異性交往，老婆陳自瑤（YoYo）為此決定「搜狐」，讓他和緋聞絕緣。

王浩信憑劇集《踩過界》的「盲俠」角色，昨日獲奧比斯邀請出席慈善活動。他表示「盲俠」一角令更多人關注眼疾問題，他說︰「一直都有捐錢畀奧比斯，之前生日加上慶祝劇集有好成績，所以都搞咗活動，就係畀你哋（傳媒）影到嗰次，其實同場除咗蔡思貝仲有監製，我叫fans將買禮物嘅錢折現捐去奧比斯。」

談到有雜誌報道，老婆「發雌威」聲稱要「搜狐」，杜絕異性埋老公身邊，王浩信聞言後表示未有留意報道，他說︰「究竟我得罪邊個？我都唔知！大家畀空間我屋企人啦。我同老婆無事，反而朋友擔心，開始唔信……（YoYo有無睇新聞？）佢要專心照顧個女，反而擔心影響個女學業，個女仲細乜都唔識，希望大家高抬貴手唔好再寫，我哋兩公婆最怕影響到個女。」至於報道所指YoYo積極「搜狐」一事，王浩信笑着反問︰「Yahoo呀？（會唔會YoYo想鞏固老婆地位？）佢唔得閒理啦！」

採訪︰Pauline

攝影︰林良明

編輯︰林梓添

設計︰梁政敏