《雜警奇兵》 黃智雯大肚婆出更

無綫向來愛拍警匪題材，學警、重案、臥底乜都有，新劇《雜警奇兵》破天荒以大肚女警做主角，黃智雯在劇中雖腹大便便，但身手靈活，而且百無禁忌，成為史上最爆陀槍師姐。

《雜警奇兵》故事發生在警隊的雜項調查小隊，專門調查非刑事離奇案件。當中成員個個騎呢，除了大肚婆黃智雯外，尚有慢條斯理的黃智賢、懶散臥底C君及過分熱心的黃心穎等。黃智雯雖身懷六甲但毫不錫身，所有孕婦禁忌都犯齊。

演喜劇有驚喜

監製吳冠宇（十仔）說︰「劇中智雯係單親媽媽，為咗畀BB更好將來，所以努力爭取表現，大住肚搬位、揼釘、甚至爭做『屍王』（處理屍體發現案的證物及調查死因）。」監製大讚黃智雯喜劇演出令人驚喜。「佢對上一次喺《律政強人》做有型律師，今次放低身段做脾氣火爆女警，感覺完全唔同，亦有別於『關二嫂』嘅巴渣。」至於男主角黃智賢今次扮演慢吞吞的口臭阿Sir，跟黃智雯一慢一快互動，表現令監製滿意。

對於新劇未能在黃金時段播放，反而在周日新時段連播兩集，監製笑說︰「我覺得反而無包袱，感覺輕鬆啲，壓力無咁大！」而兩位主角早前受訪時，均表示劇中大約每兩集完成一單案件，現時逢周日連播兩集，反而令劇情推進更加完整。

3大必睇位

心穎迷戀C君：C君在劇中雖然工作態度懶散，但原來曾是臥底，令心穎BB十分傾慕他。監製笑說︰「C君聰明轉數快，無乜邊場唔爆肚，加上心穎好適合演傻大姐，兩個演出好夾。」

好戲之人客串：新劇穿插多個離奇案件，找來不少好戲之人客串，包括首集現身的譚玉瑛姐姐，向來甚少演出劇集的她飾演清潔工人，更是案件關鍵人物。

《撒嬌》游生回歸：在《不懂撒嬌的女人》中演「游生」上位的袁文傑，在新劇中扮演明星一角，跟黃智賢、心穎BB等大演對手戲。

撰文︰李潔盈

編輯︰林梓添

設計︰梁政敏