張敬軒為愛犬推Job

愛犬如命的張敬軒，最近家中13歲的愛犬患病，令軒仔只好暫停工作，不過他已打算待香港和廣州養的貓狗過身後不再養寵物，始終牠們會比自己先離開，不希望經歷生離死別的傷痛。

張敬軒前晚出席《暗中作樂2017》音樂會，他表示在演繹王菀之的《好時辰》時，令他感到失明人士的無助，那一刻幾乎喊出來，加上很久沒有公開演唱，心情起伏很大。軒仔又謂看到這幾天澳門的新聞，又得悉有親戚朋友和歌迷都居住在澳門，希望日後參與更多同類活動。「我媽媽嘅朋友喺今次風災過咗身，真係無諗到呢個年代颱風都會造成咁大傷亡，個心好唔舒服，所以都想做多啲嘢回饋社會。」

談到愛犬病況，軒仔不諱言家人及小動物才是首位，事業只是第二位，近日每次工人來電報告狗狗情況，他都想盡快回家，所以目前接工作也盡量避免出埠。軒仔謂︰「現時在廣州有兩隻狗，香港有兩狗一貓，養完佢哋之後唔會再養小動物，雖然同佢哋相處好開心，但佢哋一定行先過你。」

陳柏宇唔敢全黑開紅館騷

另外，首次參與的陳柏宇（Jason）就自爆有過「摸黑」經驗。「幾年前有次同當時仲係女友嘅Leanne拖手，佢拖住我行一段路，我試下合埋眼行，即刻諗如果自己睇唔到嘢會點，諗諗下就喊咗出嚟。」Jason又想過演唱會加入全黑演出，不過他又笑說擔心觀眾會睇到瞓着。

撰文︰Pauline

編輯：林梓添

設計：招潤洪