囝囝譚曉風牛津碩士畢業 阿倫Po相曬命︰太開心了！

下月踏入67歲的譚詠麟（阿倫），於香港時間前晚在社交網上載愛兒譚曉風穿碩士袍的畢業照，相中，他擁抱着囝囝，雖只見到曉風背面，但不足24小時已勁吸2.4萬Like。很多粉絲也戥阿倫高興，讚曉風僅21歲已讀畢碩士是學霸！

阿倫與紅顏知己Wendy所生的愛兒曉風，多年來也備受高度保護，每次愛兒被傳媒拍到照片，阿倫也避而不談，以免兒子成為焦點。而在校長悉心栽培下，曉風早年於英國GCSE考試中，以12A*被拔尖，13年獲牛津大學工程科學系取錄，轉眼已於今年碩士畢業。

日前阿倫特地飛到英國出席曉風的畢業禮，見證囝囝的重要時刻。前晚，阿倫激罕Po溫馨父子照放閃，相中身形高大的曉風背着鏡頭，而一臉滿足的校長則豎起手指公讚好，更忍不住報喜︰「太開心了！原來一個不留神Harry Pottam已經碩士畢業了！」另一張照片中，阿倫更穿上畢業袍化身「老年版」曉風，勁有童真。不少粉絲讚偶像虎父無犬子，直指囝囝畢業應該開心過演唱會大賣。

志偉︰未見過阿倫笑得咁甜

昨午阿倫又在FB上載身在保母車的短片，他笑容滿面地說︰「大家不要在機場等我，我已經返咗香港，多謝大家關心！」其後他稱︰「而家趕住去練歌，食啲嘢先，呢幾日開心嘅，多謝晒，我哋會做好演唱會，日場會揀多啲非一般嘅（歌），日場係特別，一定係醒啲！」

阿倫好友曾志偉昨日出席活動時，亦指阿倫「巴閉」，志偉說︰「我未見過佢笑到咁甜，平時講個仔好神秘，話咩獎學金、牛津，好似中狀元。（阿倫着畢業袍？）佢一生人自己讀唔到書，我戥佢開心，個仔咁靚仔，有錢又唔使畀錢讀書，世界幾唔公平。」他又認為，阿倫應該不會讓讀飽書的曉風投身娛樂圈。

撰文︰Steven、Pat

協力︰Constance、Carol

編輯︰黃寶恩

設計︰梁政敏