劉錫賢 車保羅 37年老友記

劉錫賢和車保羅（Paul）自80年代在影視界中打滾，拍過無數經典劇集和電影，亦同樣經歷過高山低谷。兩人認識近37年，今年卻是首次一同拍劇，在ViuTv劇集《詭探》分別飾演降頭師「南叔」及茅山道士「八爺」，但沒有對手戲，他們不約而同大嘆︰「好可惜！」

要數兩人的相識，追溯至1980年。劉錫賢憶述︰「我當時參與業餘劇社演出，多數去Arts Centre（香港藝術中心）排戲，Paul哥就係技術總監，佢會安排人手同器材畀我哋。」車保羅接着說︰「之後佢入麗的電視，我已經走去拍電影。識咗咁耐，真係一次都未合作過。」

私下合作無間

車保羅在90年代與施介強（肥施）以「瘦虎肥龍」組合拍廣告爆紅，及後合作過不少電影，劉錫賢笑謂︰「我當時無咁肥，但肥施已經好肥，如果唔係我哋可能係partner啦！」《詭探》令這對老朋友聚頭，但遺憾地沒有機會同場。

雖然幕前從未正式合作，但兩人私下卻合作無間，全因車保羅自07年起在博愛醫院做雜工；而劉錫賢擔任了十年「博愛之星」，所以他們不時共事，劉說：「佢會幫我哋搞表演rundown、set場之類。」

車保羅相隔14年復出拍劇，他坦言像變了「低B」︰「見到啲新演員係點樣做嘢，然後學跟番佢哋個模式。若拍夜戲就變低B，因為個腦運作唔到。」

拍鬼故新體驗

至於被稱為「亞視忠臣」的劉錫賢，去年亞視倒閉後，曾傳出簽約無綫，他解釋實屬「美麗的誤會」︰「因為（曾）志偉話『歡迎你加入我哋大家庭』，我梗係答『好呀，多謝』，唔通話『No』咩，跟住佢哋又特登剪呢段片出嚟。」反而，他率先替ViuTv拍《詭探》。「佢哋問我有套戲想唔想接，我就諗，唔係叫我做《綠豆》呀嘛，佢哋話『今次特別啲講鬼故』，所以我就試下，睇下有無新火花。」

劇集播映以來，好評不斷，證明老戲骨的魅力依舊，亦同時令人期待劉錫賢及車保羅的幕前合作。

各有多元發展

劉錫賢現為自由身，去年三月與亞視解約後，工作亦接踵而來，「呢部戲個時間啱啱好，夾到我個真空期。七月我有舞台劇，九月去韓國巡迴同做舞台劇，十月返港要拍另一套網劇，基本上工作都排到2018年。」

而車保羅03年被無綫炒魷後，鮮有幕前演出，只是偶爾客串電影。會否重返幕前？他直言「不會」︰「有一份出糧準時嘅工，每個禮拜做45個鐘，星期六、日、紅假休息，仲有咩好求呀？」他希望偶爾參與拍攝工作便足夠，「最緊要係enjoy你份工之餘，得閒可以撞番啲老朋友，何樂而不為呢？」

撰文︰陳子楠

攝影︰Benny

編輯︰黃寶恩

設計︰梁政敏