遲到辣㷫林敏驄？ Bob︰唔好咁認真

林敏驄早前上《兄弟幫》宣傳作品展演唱會，多次不留情面掌摑主持人阿Bob（林盛斌），有傳是不滿阿Bob經常遲到而借機發洩，火藥味濃。不過，兩人事後強調只是節目效果，叫觀眾唔好誤會。

林敏驄、雨僑及陳詩慧等昨午到電視城擔任無綫節目《兄弟幫》嘉賓，順道宣傳新片《西謊極落之太爆太子太空艙》。林敏驄早前在節目上連番戲弄主持人，懷疑導火綫是阿Bob錄影遲大到，被寸沒有時間觀念。

今次阿驄再上節目，竟笑笑口繼續追打阿Bob。阿Bob謂︰「我今次已經好努力去避，但都係避唔到，我有還擊㗎，不過佢真係閃得好快。」阿Bob解釋兩人動手其實只是節目效果而已，有感上次節目出街後，網民反應熱烈，兩人在節目播出後也有聯絡，都讚節目好睇，出來效果不錯。阿Bob澄清︰「我哋喺咁混亂情況下都問到嘢，阿驄講咗好多，其實我同阿驄私底下好熟，唔會有Hard Feeling，嗰個係林敏驄嚟㗎，佢演唱會記招都係我幫佢做司儀，大家唔好咁認真啦。」對於在節目中被阿驄直斥遲到，阿Bob強調沒有遲到，又說自己工作向來準時。

阿驄無興趣做主持

問阿驄可有興趣與阿Bob一齊做主持？他毫不客氣謂︰「無興趣，我周身唔得閒。不過佢幾適合做下靶位，打佢係幾痛快，以前我都成日畀曾志偉打，我好耐無喺電視上打人，上次都係同志偉一齊打安德尊。」

撰文︰Pauline

編輯：陳禮恒

設計：梁政敏