謝君豪從南海十三郎看人生

謝君豪早前重返母校香港演藝學院，出席「精英校友分享︰謝君豪．十三郎．廿載台板結義」講座，分享他在演藝路上的成功故事。

謝君豪在93年憑舞台劇《南海十三郎》一炮而紅，主演電影版更摘下金馬影帝。畢業於香港演藝學院的他，已為《南海十三郎》舞台劇演出超過150場。他飾演的粵劇界傳奇人物南海十三郎（江譽鏐），人生大起大落，極具傳奇性，謝君豪覺得《南海十三郎》帶給他的並不單止獎項，更讓他學會對事情要多一份執着。「南海十三郎一做嘢就好似上咗身，記得排戲時，有位許師傅成日跟着我，因為佢負責成套戲嘅戲曲編排，我觀察佢做戲，從佢身上學到好多嘢。」

伴隨角色成長

謝君豪表示，全劇有很多幕都印象深刻。「套劇已經做咗廿幾年，我從好年輕的小伙子，變成相當成熟嘅年輕人，我可以將自己的經驗擺落去。譬如南海十三郎喺街上臨死前一幕，最初版本係佢跌咗副眼鏡，死都要攞番副眼鏡；但最新版本係佢自己攞開副眼鏡，話佢唔使眼鏡都睇得清楚呢個世界。年輕時有份執着、憤憤不平，現在係要識得放低，我連最後一個包袱都放低咗，就好坦然面對呢個世界，呢個係個人的理解和轉變，畀人有另外一種感覺。」

南海十三郎伴隨着一代人成長，他指舞台劇最能表演出角色的生命，這亦是他喜歡演舞台劇的原因。「電視角色只留喺演嗰一刻，但舞台劇的角色係跟住你成長，呢個係劇場嘅魔力，除咗同觀眾一齊開心，我覺得係會見到生命嘅流程、瞬間、剎那生、剎那死，生活流逝，不只是南海十三郎嘅生命，係人嘅生命透過套劇呈現出嚟。」

《心冤》揭人性黑暗

最近謝君豪與黃秋生、惠英紅合拍網劇《心冤》，劇集以近年多宗港人印象深刻的案件作重心，以奇案片角度描述重犯罪者及執法人員的心理。謝君豪與秋生並非首次合作，兩人同畢業於演藝學院，99年亦曾合演電影《千言萬語》。

撰文︰陳麗娜

編輯︰陳禮恒

設計︰梁政敏