《原諒他77次》兩性角力 阿Sa嘲男人互相包庇

周柏豪、蔡卓妍（阿Sa）為本月15日上映的新戲《原諒他77次》進行密集式宣傳，阿Sa同時忙於進行Twins巡迴演唱會，連平日被封為鐵人的她亦大呼吃不消，笑稱想過詐病來逃避宣傳工作。

柏豪、阿Sa及編劇李敏昨午到商台宣傳《原諒他77次》，柏豪稱與阿Sa合作前不算太熟，但現在兩人你一言我一語，鬧出不少笑話。談到早前接受測謊機測試，阿Sa踢爆柏豪經常講大話，問佢鍾意籃球定老婆多啲，柏豪答籃球，一心等測謊機顯示出反應，意謂心中其實愛老婆更多，怎料測謊機完全沒有反應。問柏豪可有激嬲老婆？他說老婆絕對信任他，知道只是玩玩而已。

柏豪有興趣拍《撒嬌》外傳

柏豪又自爆阿Sa比他早出道，中學時已經聽她的歌，阿Sa即做出凌厲眼神「睥」住他，柏豪立刻補鑊，讚阿Sa是個好獨立的女仔，又懂得照顧別人，應該加分。不過，他轉頭又說當年攞進步獎正是由阿Sa頒獎，可算是前輩！

輪到阿Sa表示男人們不用夾口供，都識得互相包庇避過身邊女伴的懷疑，笑指他們全部都是影帝。問阿Sa可有被這種男子嚇怕？她說︰「無計！（你以前嗰啲男友係咪咁？）唔記得好清楚，唔記得啦！」

此外，早前熱播劇集《不懂撒嬌的女人》已大結局，有傳無綫有意開拍外傳，劇中與唐詩詠最終成為一對、而又沒有露面的Sam一角，可能找周柏豪或是袁偉豪飾演。柏豪聞言表示雖然未有機會睇晒全劇，但亦有興趣參與。記者笑問他會否與Saving拗手瓜？他說︰「拍戲無所謂，現實生活就唔好啦，驚有報應呀！」

採訪︰Pauline

編輯：陳禮恒

設計：梁政敏