《撒嬌》口碑收視雙贏慶功 林文龍推Mall姐勇闖荷里活

「Mall姐」宣萱和林文龍兩位《撒嬌》的男、女主角，昨晚與劇中一眾演員包括王浩信、黎諾懿、高海寧及袁文傑等台前幕後逾120位工作人員出席慶功宴，現場筵開13席，場面熱鬧。

《撒嬌》將於本月28日晚上播出兩小時大結局，問宣萱和林文龍會否感到不捨？宣萱表示︰「一定要捨得，套劇有咁好成績已經有所交代。」有傳監製想開拍《撒嬌》系列，宣萱被問到可有興趣接拍？她直言︰「要睇劇本，之前喺電台做訪問，阮兆祥講笑話開套『不懂食蕉的女人』。我覺得開拍續集有危機，最好見好就收。」而林文龍受訪期間不斷抬舉宣萱，更踢爆她酬勞貴︰「成個劇都係賣佢，請佢拍嘢好貴㗎，TVB都無錢再請佢拍，或者叫佢收少啲。（兩個人一齊拍？）咁要睇下邊個收少啲，佢（宣萱）拍完呢套劇就會勇闖荷里活，我就去荷里活廣場。」

宣萱暫停再拍劇

全程在旁大笑兼反白眼的宣萱，一再強調自己是看劇本而決定，她說︰「劇本啱就做，但我暫時唔會再拍劇，我一連都拍了兩套，所以唔會諗住。」而開製作公司的林文龍，被問到會否請同一班底開戲？他坦言是好提議︰「呢類輕鬆喜劇會多人睇！（搵宣萱拍？）佢貴成咁，我公司破幾次產都搞唔掂。」

撰文：Pat、Steven

攝影：林良明

採訪：Pauline