容祖兒開騷 公開初戀情書

容祖兒《My Secret Live》演唱會前晚在灣仔演藝學院開鑼，正與「師兄」劉浩龍拍拖的她罕有地與fans分享擇偶條件，她說︰「我擇偶完全唔會睇外表，男朋友都唔會揀靚仔。」引得在場觀眾發笑，她認真表示︰「唔好笑，唔鍾意靚仔唔代表鍾意醜樣！反而鍾意啲有肉地、肉騰騰、淋淋地嗰啲。」講完擇偶條件，祖兒又分享一封她13歲時寫的情信︰「93年3月16號，Dear乜乜乜……點解我會X你，因為你可愛得意，可唔可以再乖啲啊？你可唔可以回信畀我啊？你X唔X我啊？」祖兒笑住解釋「X」不是大家所想的意思，又說因為自己細膽，這封信一直沒有交到對方手中。

完騷後祖兒受訪時坦言，公開情書是演唱會總監的構思，問到祖兒可有邀請初戀情人睇騷，順便將情信交給他？她笑謂︰「無，我珍藏嚟。」那師兄可對她講「我X你」？她笑說︰「佢唔X（鬧）我就偷笑。」