返無綫唯一條件 張衛健要珍姐出山客串

張衛健（Dicky）、許志安、伍詠薇、梁漢文及蘇永康等，前晚到電視城錄影遊戲節目《我愛香港》。久未在電視熒幕露面的Dicky，暗示不久將來重返「母校」拍劇。

Dicky離開無綫多年，前晚再度踏足TVB，早前有指他考慮重返娘家拍劇，言語間他似乎有所暗示：「空穴來風未必無因。（有意拍劇？）我離開母校後從來冇否認過呢個可能性。」Dicky稱目前與無綫並無合約，不過回來拍劇的附帶條件，就是無綫高層曾勵珍「出山」拍劇：「問咗珍姐先，等佢出山做演員，做一頭一尾集數都好，呢個係唯一要求，佢ok我ok，佢唔ok我都考慮下。」

談到同場的安仔有意拉攏Big Four成員去旅行，不過以Dicky最難度期，他聞言後否認：「點會呀！我係比較顧家，將時間、金錢、精力都畀晒老婆。睇佢哋花花弗弗咁，睇落不負責任。（你顧住賺人民幣？）唔講呢啲喇。」

安仔收肉麻信件感尷尬

安仔目前籌備新碟，封套要在腹上畫畫，為此他要節食兼操肌，問他是否要操番六嚿腹肌？他直言：「操唔番咪將個公仔畫大啲遮住個肚！」

另外，提到日前為陳柏宇擔任個唱嘉賓，對方曾向他寫下四頁紙邀請信，安仔笑言首次收到男生的「肉麻信件」，覺得有點尷尬，「我幻想係個女仔寫畀我，但諗起佢寫就尷尬。」

撰文：Pauline

編輯：林梓添

設計：梁政敏