台慶騷講錯每個藝人「粉身碎骨」 陳凱琳認中文差 視迷：抵畀Do姐靚抽

《萬千星輝賀台慶》前晚曲終人散，大會司儀之一的陳凱琳（Grace）在鏡頭前指藝員們落力演出，卻不慎將「奮不顧身」誤讀「粉身碎骨」，其後Do姐在介紹環節時「靚抽」後輩，不少網友激讚Do姐寸得妙；有人則力撑Grace是無心之失卻被無限上綱！

前晚無綫舉行全長兩小時的年度大騷《萬千星輝賀台慶》，整體節目略嫌沉悶，最具話題性卻是司儀之一的2013年港姐冠軍陳凱琳「拋錯書包」，其「粉身碎骨」論片段在FB瘋狂洗版。事緣「盛女三條Queen」環節後，Grace與陳百祥（阿叻）作總結，她竟禍從口出：「頭先佢哋高踭鞋又高，個台又高，真係唔容易！所以話TVB每一個藝人都係『粉身碎骨』，務求令大家開心！」其發言擺明將「奮不顧身」錯讀成「粉身碎骨」。

Do姐稱純屬開玩笑

身為無綫金牌司儀的Do姐睇唔過眼，借另一司儀丁子朗抽盡Grace：「做我哋藝員一定要對觀眾負責，如果唔係明明『奮不顧身』就變成『粉身碎骨』喇。」

兩位主角陳凱琳及Do姐完騷後結伴受訪，Grace直認中文麻麻，不知自己講錯：「我有時拍古裝劇都講錯四字詞語，Ben（黃智賢）、John哥（姜大衞）都會問我講乜！」至於Do姐則自言在台下發現Grace講錯說話，因此到自己上台介紹時，以前輩身份借此事向拍檔丁子朗開玩笑。不少網民盛讚Do姐轉數快表現其江湖地位；另一方面，有粉絲卻慨嘆Grace被抽水抽到「粉身碎骨」，勁可憐。

協力：Constance

撰文：Steven、Pat

編輯：黃寶恩

插圖：何樂

設計：梁政敏