囡囡擺百日宴 關心妍唔敢再追B

關心妍今年七月誕下囡囡楊榮心（Jovia），昨日與老公楊長智在四季酒店舉行百日宴，現場布置盡顯心思，除了有多個心形氣球遍布會場，還有一個巨型吹氣熊公仔，氣氛十分歡樂。而小主角Jovia眼仔碌碌相當可愛，一家三口率先合照大曬幸福。

關心妍（Jade）表示百日宴由老公全權負責籌備，所以她都不清楚花費多少。Jade表示：「囡囡件心心衫都係刻意搵，場地嘅心形氣球都係為咗配合阿女個名，依家Jovia三個半月大，有13磅重，已經要着六個月大嘅BB衫，今日呢件衫都差啲唔啱身呀。」有女萬事足的Jade，問她會否考慮再追多個仔？她笑言：「個女都追咗七年先有，我驚追多個唔知又要等幾多年，其實老公鍾意女，追唔追個仔，順其自然啦，有呢個女我已經好感恩。」

一直堅持盡量餵母乳的Jade，昨日自爆B女已戒掉母乳。「因為本身奶水唔夠，擔心佢唔夠飽，所以畀佢食奶粉。」她笑言餵母乳後上圍升了3 cup，即使停餵母乳上圍也沒有跌watt，現在食得清淡一點，努力下才瘦了八磅，不過離目標還有少少距離。Jade亦坦言暫時未有復出計劃，最主要是不捨得個女，現在與老公出街，在晚上12點前一定回家，她說：「難得個女又戒埋夜奶，唔想半夜嘈醒佢又要食多餐。

餵人奶連升3 cup

不少圈中人昨日亦獲邀到場，蒙嘉慧單拖現身，她解釋因為伊健身在杭州拍戲，問她會否改變初衷生番個？她說：「暫時無呢個打算。」而許廷鏗和胡鴻鈞孖住現身，他們透露與欣宜及林欣彤夾份送了件「見到個心會溶」的衫仔給BB女，許廷鏗又謂第一次見BB女，心情相當緊張。

採訪：Pauline

編輯：林梓添

設計：梁政敏