放棄拍阿Sa新戲 余文樂稱與片酬冇關

蔡卓妍（阿Sa）近日籌備新戲《原諒他77次》，獲大批好友客串支持。不過，有傳余文樂嫌片酬低已推辭做男主角，最終亦搵了樂仔「死敵」周柏豪頂替。

余文樂前晚出席品牌活動，提到阿Sa開戲，並有意搵他合作，卻有傳阿樂嫌片酬低而推掉。樂仔回應：「一直以來接洽工作從來唔會問價錢，之前有Project，我一蚊都冇收過，接job唔係以錢行先。我與公司有共識，要睇適唔適合自己，會唔會有新嘗試。」

再問他曾否接洽阿Sa的新戲？他解釋公司通常會篩選過，認為劇本及角色適合他才再跟進。不過阿樂突然想起阿Sa曾致電給他，當時對方沒有再談進度。

那麼可會主動聯絡阿Sa，向她解釋並非嫌片酬低而推戲？他續說：「唔需要解釋，大家做嘢都知道唔係為錢，就算畀好多錢我，但我做唔到個角色都唔會勉強。」

唔介意周柏豪頂上

對於現時由周柏豪頂上，阿樂覺得誰人接演都無所謂，希望部戲拍攝順利，並謂：「電影成日都會換人，可能產生其他火花也說不定。」

撰文：Pauline

編輯：陳禮恒

設計：李明