買2000萬樓 馬明升呢「鑽石筍盤」

馬國明近日被踢爆豪擲2000萬置業，昨日他出席新劇造型活動時直認已榮升業主，但就否認是一次過付款，他笑言：「做鴨都冇搵咁多啦！」

馬國明昨日與黃智雯及劉佩玥等人出席以靈異為題材的新劇《降魔的》造型活動，早前盛傳拒與無綫續約而遭雪藏的馬明，透露跟無綫續約，並指今次續約後自由度更大。馬明承認已買樓榮升業主，即由「筍盤」升呢「鑽石級筍盤」，他透露新居會於年底前入伙，且繼續與父母同住，馬明表示：「新屋有個空中花園，可以畀媽咪種菜，而且佢成日話冇位晾衫，咁可以住得舒服啲啦！」認真孝順。

劉佩玥驚冇人追

不過馬明強調今次買樓是媽咪和家姐的主意：「其實講買樓都講咗好多年，只係一直睇唔啱啫。（係咪一次過畀錢買？）要供，做鴨咩？做鴨都冇搵咁多啦！（買大單位預備將來結婚同屋企人住？）咁又冇諗咁長遠，不過舊屋會放租。」對於有傳他曾力追王君馨，馬明連忙否認及表示：「冇，佢係好女仔，我只係拍《心理追兇》時，就有查過佢。」

而被指帶緋聞男友伍允龍出席姊妹聚會的劉佩玥，則笑言跟對方一直是好朋友，她又希望外間不要認定伍允龍是她男朋友，否則會嚇怕追求者。

至於最近備受力捧劇接劇，劉佩玥坦言不會自滿：「作為新人有咁多機會拍劇係好開心，但我會努力改善不足地方，希望觀眾見到我有進步。」

撰文：倪小珊

編輯：林梓添

設計：Stephen