憶蓮開騷 直認愛恭碩良

林憶蓮前晚舉行紅館個唱尾場，原來憶蓮的一班中學同學、以及契爺胡楓均坐在第一行捧場，令眼淺的憶蓮感動得數度落淚。憶蓮在台上指着老友倫永亮大叫「我好愛你呀！」倫永亮就指住憶蓮男友、擔任鼓手的恭碩良，憶蓮即甜笑說：「呢種愛同嗰種愛唔同，唔可以混淆。」

唱到凌晨零時完騷的憶蓮，接受訪問時提到兩種不同的愛，「一個係友情嘅愛，一個係愛情嘅愛，我都唔係第一次公開講。」又表示個唱令她十分感動，「今次揀啲歌係代表咗自己成長，香港真係需要多啲正能量！」