拒買私人飛機 譚詠麟：出外靠朋友

譚詠麟（阿倫）昨日由譚校長變身Captain Tam，以型仔飛機師Look出席學生航空體驗計劃，帶領一班小朋友參觀飛機駕駛艙。阿倫因工作關係經常周圍飛，問他可會購買私人飛機代步？他笑說：「身邊好多朋友都有飛機，我唔使買！」

阿倫自言考慮過學習駕駛飛機，因為感覺十分有型，他說：「我成日飛，啱啱去完加拿大、澳洲同台灣，高峰時試過一年只有三個月喺香港。」家人可會投訴他時常不在家？他說：「我會安排好，男人都要工作。」

爆阿叻斟茶認錯

另外，提到好友陳百祥（阿叻）自爆踢波時曾激嬲阿倫，阿倫聞言笑說：「我哋冇嘢好耐啦，前日先一齊踢波，不過我發誓唔會再同阿叻對戰，因為佢有色盲，一睇到其他隊着唔同顏色球衣就亂嚟！」他指阿叻曾向他斟茶認錯，「我話唔使咁隆重，大家係朋友，講說話唔好去到咁盡。」

撰文：李潔盈

編輯：黃寶恩

設計：鄧俊明