那些年最愛的偶像 歐陽妙芝情迷劉華24載

台片《我的少女時代》大熱，戲中女主角愛劉德華愛到發狂，令不少人緬懷年輕時迷戀偶像的時光。原來連明星名人也不例外，名模歐陽妙芝出名是華仔死忠，她說：「劉生唔止係我偶像，仲係我嘅青春秘方，每次見到佢都有初戀感覺！」

說起跟華仔的淵源，妙芝笑說：「我講足一晚都得！」91年仍是兼職模特兒的她，獲華仔睇中擔任《再吻我吧》MV女主角，拍攝時深情對望後即時被華仔迷倒：「我當時好緊張，但劉生好溫柔，見我頭髮亂咗主動幫我整理，係我最美麗嘅回憶。」93年華仔開首次紅館個唱，妙芝再為對方伴舞，「我第一次拍MV、第一次踏足紅館，都係劉生畀我，我好幸運！」

妙芝更是華仔官方歌迷會「華仔天地」中的活躍成員，日前歌迷會舉行華仔生日會，她在趣劇環節扮演觀音，跟「孫悟空」華仔同台演出，綵排時更獲偶像送上驚喜。「劉生突然拎個生日蛋糕同我補祝生日，我招架唔住，手都震埋，佢話幫我托住個蛋糕！」

見華仔如見男友

談起偶像滔滔不絕，就知她愛華仔的程度達「入血」級。「我前排邊修甲邊睇《我的少女時代》預告片，竟然睇到喊，連修甲師都話我太爆。」她的電話套內，長期放有偶像靚相做護身符，「老公同囝囝有時激親我，但我一見劉生張相就笑番，佢好似心理醫生咁。」她更直言每當見華仔，就像跟初戀男友約會般緊張：「見佢之前我會勤啲做facial同keep fit，諗定衣着同噴邊款香水。每次見到佢，我都好似停留喺廿年前嘅少女時代，佢係我扮靚原動力，冇咗佢唔得！」

撰文：李潔盈

編輯：林梓添

設計：梁政敏