陳詠謙X朱薰 暖笠笠迎聖誕

陳詠謙，是一名填詞人，今年他多了歌手和爸爸兩個身份。朱薰，年中再添小女兒，湊成「好」字。兩人趁聖誕佳節參與義工活動，齊化身聖誕老人回信，還不忘分享湊仔經，跟近日天氣一樣，今個聖誕暖到入心！

盛產慘情歌的陳詠謙，今年有大熱作品《矛盾一生》及《經過一些秋與冬》等，不過現實中的他，可是個不折不扣的幸福男人。今年初再婚迎娶圈外女友，更於10月尾一索得男，不久就寫了《給兒子的信》，道出初為人父的心聲。

首度以爸爸身份過聖誕，陳詠謙可謂做足準備，務求令兒子感受濃厚的聖誕氣氛。「已經裝飾咗聖誕樹，又將餐枱布轉晒紅色，仲幫囝囝買咗件麋鹿衫添！」不過，當了「湊仔公」後，大時大節就不能再經常外出參加派對，他笑指：「點慶祝？首先梗係要餵番餐聖誕奶啦。其實本身聖誕我都唔會點出街，太多人，可能叫啲人上嚟開party。」

小朋友大過天

身旁的朱薰亦身同感受：「有咗家室嘅人都傾向呢個方向，只係想有個室內地方，有得換片、餵奶，咁樣已經好好。」

雖然兩人經常戲稱「小朋友好麻煩」，但說到「湊仔趣事」，嘴角就不自覺上揚。陳詠謙滔滔不絕稱：「見到個仔第一次笑到見牙唔見眼，嗰一刻係好冧，佢塊面肥嘟嘟，成個蘋果咁。同埋望住老婆湊仔，心入面就覺得好幸福。不過，佢暫時又唔會畀家用我，無一個實質嘅快樂，而家啲快樂就比較縹緲。」

努力搵奶粉錢

這位幽默感爆燈的音樂人，表明不會減產，要繼續努力賺錢。「無原因會令我寫少啲歌詞，因為我真係好鍾意，但填詞係好孤獨嘅工作，所以做歌手一來可以面對人，二來唱歌都係另一個對樂壇有貢獻嘅事。」看來，這是好爸爸努力工作的證明，更是廣東樂壇的好消息。

聖誕老人回信

由朱薰主持的商台節目《你好嘢》，最近與「郵心出發」合作，招募一班有心人化身「聖誕關義工」，協助聖誕老人回信。要親筆回覆所有來信，童真和寫作技巧都不可或缺，朱薰遂邀請陳詠謙作導師。原來他除了填詞，閒時也會執筆寫信，「間唔中會寫信畀老婆，因為有啲嘢講出口好肉麻，咁就會寫信話佢知。」相信將這份暖意教導給一班「聖誕關義工」，會令收信人更加窩心。

撰文：陳子楠

編輯：陳禮恒

攝影：林良明

設計：梁政敏