食得是福

午飯時間，同事們一人一碗自選餸菜的粉麵。

「咦？阿美，乜你唔係成日話河粉肥㗎咩，平時都好少見你食，做咩今日破戒啊？」Shirley問。

「唉！我平時嗌開米粉，以為米粉應該最健康，點知最近先發現原來米粉嘅卡路里，比河粉、瀨粉等等仲要高，真係大跌眼鏡！今日咪決定食吓無掂好耐嘅河粉囉！」阿美飲恨。

「阿美，雖然你揀咗卡路里比較低嘅河粉，但你揀嘅餸……鴨腎、鵝腸……」Amy插嘴。

「我知你想講咩，內臟膽固醇高嘛！雖然我膽固醇係有啲擲界，不過醫生話我無三高㗎！」阿美搶着回應。

「哈哈！我同你一樣！真係感恩現今醫學昌明，有降膽固醇藥，我先可以安心繼續食我嘅牛膀牛肚米線！」Shirley道。

Amy苦笑，但也並非不理解兩位同事的取態。美食當前，食得是福，粉麵揀低卡一點的，算是一種自我安慰。

最後，本來沒點內臟，吃墨魚鵝片瀨粉的Amy，都忍不住飛象過河，夾返條鵝腸食吓！

Amy：「綠茶有助降低壞膽固醇啊！等我一陣返到公司即刻沖返壺，大家一齊飲啦！」

（本欄逢星期一、四刊登）