膽量養成：無懼職場的昆蟲

自小，好多人都話我大膽。朋友認為我習慣獨來獨往，自小一個人四圍去，所以練到好大膽。膽量是可以鍛煉的嗎？我沒有研究過，但覺得膽量跟心態有關。

記得N年前去南非拍《寰宇風情》，在南非逗留了三個星期。有一晚，我們攝製隊入住祖魯族人的聚居地，那裏的人沒有穿衣服，只用少量碎布遮蓋着重要部位，還手持武器。他們住的屋是用草和竹搭建，沒有門鎖，窗戶是草編織而成的。攝製隊有四人，每人住一間屋，屋與屋之間距離好遠。當時我心諗，萬一我叫救命，可能同事都聽不到。

當時我真的好累，已經十日沒睡覺，知道自己真的好需要休息，但又不敢入睡，擔心會有人揸住支長茅衝入我屋。當時我躺在床上望着天上閃爍的星星，心諗：“我從來冇做過虧心事，雖然未必是一個完美的好人，但絕對不是壞人。既然無愧於心，冇咩需要驚，唔好再諗咁多，瞓覺啦。” 從此以後，我不再怕黑了。究竟是心態令我不怕黑，還是膽量是可以鍛鍊出來的，我仍在研究中。

一次，辦公室大堂發現一隻小曱甴，估計小曱甴是跟隨客人從外面進來的。同事們見到曱甴，驚到雞飛狗走，甚至有人走入大老闆房求救，老闆不理睬她們。為免男同事出來扮救世主把曱甴殺掉，我馬上在打印機取了一張A 4紙，再用一隻紙杯輕輕把昆蟲捕捉，然後送他出門外。當我從外面再進入辦公室時，同事見到我，都好似見到鬼咁，有同事叫我“蜘蛛俠”，表現得好畏懼我。同事們背後更說我黐線，我唔黐線又點可以同佢哋一齊做工？

此後，每當有大小昆蟲到訪，同事把我視為辦公室的護衛員。我看着她們雙手掩着口扮驚恐的樣子，還大聲說：「Angela，你唔怕咩？」我忍唔住答：「你哋呢班神憎鬼厭嘅人我都唔怕，點會害怕一隻小昆蟲？」突然間，全場靜了下來，所有人語塞。

（本欄隔星期二、逢星期五刊登）