多元共融藝術巡禮

「Weekend有咩好節目啊？」Blue Monday！辦公室裡各人未在狀態，Amy帶起話題，幫大家醒醒神！

阿美回應：「阿囡陪咗我入戲院睇《看我今天怎麼說》，黃修平導演，游學修、鍾雪瑩主演，入場前已經對呢套戲有好大期望，最後都無令我失望！」

「我都見呢套戲有好多好評，講失聰人士點樣融入社會，鍾雪瑩仲喺金馬獎獲頒最佳女主角！你都話好睇，我就要快啲趁佢未落畫去睇嘞！」Shirley附和。

阿美興奮道：「咁睇完部戲，經過西九戲曲中心，又見到一個『回聲之橋：藝術展覽』！展覽由勞福局同香港展能藝術會籌劃，有幾個同殘疾人士做藝術培訓、共融藝術嘅機構，都有份參與。展覽展示唔同類別嘅殘疾人士畫嘅畫、影嘅相，好佩服佢哋嘅努力同天份，睇完之後就覺得自己真係冇藝術細胞，哈哈哈！」

「咁我都想去睇啊！展覽展到幾時？」Amy問。

阿美：「展到3月30號，呢個展覽只係『多元共融藝術巡禮』嘅其中一個活動。聽日25號喺戲曲中心茶館劇場仲有『共鳴之橋：共融音樂會』，由視障二胡演奏家楊恩華以及自閉症特色鋼琴演奏家莫梓源，帶領觀眾領略中西音樂嘅迷人魅力。27號又有『青田遊樂場』舞台劇；另外藝墟、共融藝術工作坊、多元才能共融職場資訊站，都係喺戲曲中心舉行，節目非常豐富，嚟緊兩個禮拜都不愁無地方去啦！」

Shirley：「等我又上網做吓功課睇吓啲資料，拉埋男朋友陪我去先！」

（本欄逢星期一、四刊登）