舊詞新解

週末與親戚聚餐，吃到尾聲，侍應拿着帳單進來，大伯打趣道：「我身無分文！」年輕侍應呆了一呆，大伯隨即補充：「我指我無帶現金啫！有無得碌卡啊？」侍應忍俊不禁，同時也拿出手提的收款機器，大伯拍一拍信用卡，即時就找到數。

侍應離開後，我們都笑大伯衰，整蠱人！大伯話，退休後每日「坐以待斃」，我們紛紛大叫「啋！」大伯又補充：「放心，我唔會咒自己，我講嘅坐以待『幣』，係金幣個幣啊！退休之後無嘢做，坐喺度等仔女過數俾家用我嘛！」哈哈！大伯總是要找點樂子！看來舊詞現在都有新的解讀方法了！

我也想起一個舊詞新解的例子，以往大家叫「BB」，多指初生嬰兒，但不知何時起，越來越多人將自己偶像的名字加個B字，街知巷聞的有姜B（姜濤），到最近忽然紅到可以同Mirror爭叱咤「我最喜愛的男歌手」的光B，連尹光自己都笑指以前多數被人叫光爺，現在越叫越細！

食完晚飯，一行人散散步，經過鰂魚涌糖廠街，見到裝飾十分漂亮的市集，原來是太古地產的「白色聖誕市集」，入面有嘢玩，有嘢食，可惜我們已食飽飽，不過都拍了不少相片打卡！市集的職員說本週末（12月8至10日）市集都會開放，大家決定到時來吃喝玩樂！

（本欄逢星期一刊登）