7中學學生非洲連綫對話 為吉布提醫療隊共享基金會同事打氣

今日係世界非政府組織日，黛安聽聞，為增加學生對人道救援工作嘅認識，共享基金會早前安排身在非洲吉布提嘅香港同事、山西省醫療隊成員、駐非洲當地同事及廣西醫療隊成員，與來自7間學校、29位學生實時連綫對話，分享佢哋喺人道救援工作嘅心路歷程，以及吉布提、老撾和柬埔寨等地嘅情況。基金會亦安排咗小型展覽，介紹基金會喺一帶一路國家嘅人道救援項目等。唔少同學就喺橫額寫上鼓勵字句，為吉布提嘅醫療隊及共享基金會同事打氣。

來自聖保祿學校嘅何同學和郭同學話，土耳其大地震激發佢哋對人道救援嘅興趣，仲話從呢個活動了解到人道救援需要唔同專業領域人士合作，包括工程師、繙譯、行政人員和醫療團隊等；拔萃女書院曾同學則感謝吉布提團隊「為視障患者帶來光明」。

黛安知道，共享基金會去年9月及12月，分別去過老撾及柬埔寨啟動人道救援項目，並喺疫後立刻前往非洲吉布提，喺當地啟動首個消除白內障致盲項目，計劃未來數年喺當地進行6,000宗免費白內障手術。