生蛇痛 有不少後遺症

細個時我出過德國痲疹、水痘，生過痄腮等，朋友話我仲爭未生蛇，我啋！坊間傳說，如果生蛇圍繞身體一圈就會引致死亡，而家當然知道唔係真啦。

生蛇多數係一條神經綫受感染，形成一條蛇串狀紅疹圍繞患處，例如腰背。間中有患者嘅左右兩邊神經綫唔好彩同時受感染，令身體兩邊同時生蛇，形成生蛇一圈嘅情況，但呢種情況並不代表病情特別嚴重，亦唔會如坊間所講會致命。不過，生蛇帶來嘅痛楚真係令人非常難受，絕對毋須懷疑！患者仲有機會出現種種後遺症。

我之前完全無生蛇概念，但隨住年紀大咗，身邊有好多好似我呢個年紀嘅朋友都陸續生蛇，唔到我唔驚。其中一個叫黎瑞恩，生蛇生上眼，眼部至眉心又紅又腫，成個月都未康復，仲差啲毁容，好彩最後都好番。

眼生蛇有機會出現角膜炎、視神經炎、動眼神經麻痹、青光眼、急性視網膜壞死、永久視力受損，甚至可能會失明。通常工作壓力大、睡眠不足、作息不正常，都會引致免疫力下降，令潛藏喺體內嘅水痘病毒爆發，就好容易出現帶狀皰疹（即係生蛇）。

有研究指50歲以上係高發病人群，感染新冠病毒後嘅人，比起未感染新冠病毒人士，出現帶狀疱疹風險高出15%，去到呢個地步，都唔到我唔嗱嗱聲去打預防針。每個人打完預防針都可能出現唔同副作用，我嗰日打完後，成個人好似畀大石砸住。因人而異，當然要請教醫生啦！

（本欄逢周四刊登）